ឈ្មោះ

សមាគមនេះមានឈ្មោះជាភាសាខ្មែរថា “សមាគមជនមានពិការភាពហង់សិននៅកម្ពុជា” សរសេរអក្សរកាត់ថា ស.ជ.ហ.ក. ជាភាសាអង់គ្លេសថា CAMBODIAN ASSOCIATION OF HANSEN PEOPLE WITH DISABILITY ជាអក្សរកាត់ថា C.A.H.D ។

ទីស្នាក់ការ

សមាគមជនមានពិការភាពហង់សិននៅកម្ពុជា មានទីស្នាក់ការកណ្តាលបច្ចុប្បន្នរបស់សមាគម មានទីតាំងស្ថិតនៅក្នុងខេត្តកំពង់ចាម។ ទីស្នាក់ការកណ្តាល ស.ជ.ហ.ក. អាចផា្លស់ប្ដូរទីតាំងបានក្នុងករណី ចាំបាច់និងតាមការសម្រេចចិត្ដដោយសំឡេងភាគច្រើននៃសមាជិកក្រុមប្រឹក្សាភិបាលនិងគណៈកម្មការប្រតិបត្តិ។

ស.ជ.ហ.ក. អាចមានទីស្នាក់ការ ឬការិយាល័យសាខានៅតាមរាជធានី ខេត្តតាមតម្រូវការចាំបាច់ របស់សមាគម និងអាចបិទទីតាំងបានក្នុងករណីចាំបាច់។

អត្តសញ្ញាណ

សមាគមជនមានពិការភាពហង់សិននៅកម្ពុជា គឺជាសមាគមមនុស្សធ៌មអព្យាក្រឹត មិនស្វែងរក ផលចំណេញ មិនប្រកាន់ពូជសាសន៍ មិនប្រកាន់សាសនា មិនប្រកាន់និន្នាការនយោបាយ មិនធ្វើនយោបាយ មិនធ្វើជាឧបករណ៍នយោបាយក្នុងនោះមានរួមទាំងមិនផ្តល់មធ្យោបាយជាសម្ភារ ហិរញ្ញវត្ថុ និងធនធានមនុស្ស ដើម្បីគាំទ្របក្សនយោបាយ ឬអ្នកនយោបាយ បេក្ខជននយោបាយឬអ្នកគាំទ្រនយោបាយណាមួយឡើយ។

រូបសញ្ញានិងត្រា

សមាគមជនមានពិការភាពហង់សិននៅកម្ពុជា មានរូបសញ្ញានិងត្រារបស់ខ្លួនរាងជារង្វង់មូល ដូចមានគំរូនៅក្នុងឧបសម្ព័ន្ធ។

• រូបសញ្ញាមានអក្សរខ្មែរសរសេរថា សមាគមជនមានពិការភាពហង់សិននៅកម្ពុជា អក្សរកាត់ ស.ជ.ហ.ក. រាងកោងពីលើចុះក្រោម និងអក្សរអង់គ្លេសសរសេរថា CAMBODIAN ASSOCIATION OF HANSEN PEOPLE WITH DISABILITY អក្សរកាត់ C.A.H.D រាងកោងពីក្រោមឡើងលើ។

• ត្រារបស់សមាគមសណ្ឋានជារង្វង់មូលមានអង្កត់ផ្ចិត៣៤មីលីម៉ែត្រមានសញ្ញាសម្គាល់សមាគមនៅខាងក្នុងនិងប្រើទឹកល័ក្តព៌ណខៀវ។

• រូបបាតដៃទាំងប្រាំតំណាងឱ្យជនពិការដោយសារជំងឺហង់សិនមាននៅទ្វីបទាំងប្រាំនៃផែនដី

• ផ្ទៃព៌ណសបង្ហាញពីអនាម័យ ភាពស្អាតស្អំ សុខសន្តិភាព ភាពស្មោះត្រង់របស់ជនពិការហង់សិន។